مکمل شاعری

شہر کی گشت میں ہیں صبح سے سارے منصور

اب تو منصور وہی ہے جو سر دار نہیں

دھوپ اٹھاتا ہوں کہ اب سر پہ کوئی بار نہیں

بیچ دیوار ہے اور سایۂ دیوار نہیں

مت سنو مجھ سے جو آزار اٹھانے ہوں گے

اب کے آزار یہ پھیلا ہے کہ آزار نہیں

سوچتا ہوں کہ بھلا عمر کا حاصل کیا تھا

عمر بھر سانس لیے اور کوئی انبار نہیں

اب وہ حالت ہے کہ تھک کر میں خدا ہو جاؤں

کوئی دل دار نہیں کوئی دل آزار نہیں

جن دکانوں نے لگائے تھے نگہ میں بازار

ان دکانوں کا یہ رونا ہے کہ بازار نہیں

وقت کو سود پہ دے اور نہ رکھ کوئی حساب

اب بھلا کیسا زیاں کوئی خریدار نہیں

یاد آشوب کا عالم تو وہ عالم ہے کہ اب

یاد مستوں کو تری یاد بھی درکار نہیں

مجھ سے تم کام نہ لو کام میں لاؤ مجھ کو

کوئی تو شہر میں ایسا ہے کہ بیکار نہیں

— سید حسین جون اصغر