مکمل شاعری

لمحہ بہ لمحہ دم بہ دم آن بہ آن رم بہ رم

میں بھی گزشتگاں میں ہوں تو بھی گزشتگاں میں ہے

ایک گماں کا حال ہے اور فقط گماں میں ہے

کس نے عذاب جاں سہا کون عذاب جاں میں ہے

آدم و ذات کبریا کرب میں ہیں جدا جدا

کیا کہوں ان کا ماجرا جو بھی ہے امتحاں میں ہے

خود میں بھی بے اماں ہوں میں تجھ میں بھی بے اماں ہوں میں

کون سہے گا اس کا غم وہ جو مری اماں میں ہے

شاخ سے اڑ گیا پرند ہے دل شام درد مند

صحن میں ہے ملال سا حزن سا آسماں میں ہے

بود و نبود کا حساب میں نہیں جانتا مگر

سارے وجود کی نہیں میرے عدم کی ہاں میں ہے

اس کا فراق بھی زیاں اس کا وصال بھی زیاں

ایک عجیب کشمکش حلقۂ بے دلاں میں ہے

کیسا حساب کیا حساب حالت حال ہے عذاب

زخم نفس نفس میں ہے زہر زماں زماں میں ہے

— سید حسین جون اصغر