مکمل شاعری

کیا ہو گیا ہے گیسوئے خم دار کو ترے

آزاد کر رہے ہیں گرفتار کو ترے

اب تو ہے مدتوں سے شب و روز روبرو

کتنے ہی دن گزر گئے دیدار کو ترے

اب اتنی کند ہو گئی دھار اے یقیں تری

اب روکتا نہیں ہے کوئی وار کو ترے

باہر نکل کے آ در و دیوار ذات سے

لے جائے گی ہوا در و دیوار کو ترے

کل رات چوب دار سمیت آ کے لے گیا

اک غول طرحدار سر دار کو ترے

اب رشتۂ مریض و مسیحا ہوا ہے خوار

سب پیشہ ور سمجھتے ہیں بیمار کو ترے

اے رنگ اس میں سود ہے تیرا زیاں نہیں

خوشبو اڑا کے لے گئی زنگار کو ترے

— سید حسین جون اصغر