مکمل شاعری
میں نہ ٹھہروں نہ جان تو ٹھہرے
کون لمحوں کے روبرو ٹھہرے
نہ گزرنے پہ زندگی گزری
نہ ٹھہرنے پہ چار سو ٹھہرے
میں یہاں مدتوں میں آیا ہوں
ایک ہنگامہ کو بہ کو ٹھہرے
ہے مری بزم بے دلی بھی عجیب
دل پہ رکھوں جہاں سبو ٹھہرے
ایک چاک برہنگی ہے وجود
پیرہن ہو تو بے رفو ٹھہرے
اک توجہ عجب ہے سمتوں میں
کہ نہ بولوں تو گفتگو ٹھہرے
محفل رخصت ہمیشہ ہے
آؤ اک حشر ہا و ہو ٹھہرے
کج ادا تھی بہت امید مگر
ہم بھی جونؔ ایک حیلہ جو ٹھہرے
باغ جاں سے ملا نہ کوئی ثمر
جونؔ ہم تو نمو نمو ٹھہرے
میں جو ہوں کیا نہیں ہوں میں خود بھی
خود سے بات آج دو بدو ٹھہرے
— سید حسین جون اصغر