مکمل شاعری
کون سے شوق کس ہوس کا نہیں
دل مری جان تیرے بس کا نہیں
راہ تم کارواں کی لو کہ مجھے
شوق کچھ نغمۂ جرس کا نہیں
ہاں مرا وہ معاملہ ہے کہ اب
کام یاران نکتہ رس کا نہیں
ہو گئی اس گلے میں عمر تمام
پاس شعلے کو خار و خس کا نہیں
کیا لڑائی بھلا کہ ہم میں سے
کوئی بھی سینکڑوں برس کا نہیں
ہم کہاں سے چلے ہیں اور کہاں
کوئی اندازہ پیش و پس کا نہیں
مجھ کو خود سے جدا نہ ہونے دو
بات یہ ہے میں اپنے بس کا نہیں
— سید حسین جون اصغر