مکمل شاعری
میں جو بیٹھا ہوں تو وہ خوش قامت
دیکھ لو بار بار اٹھتا ہے
اس کی گل گشت سے روش بہ روش
رنگ ہی رنگ یار اٹھتا ہے
تیری صورت کو دیکھ کر مری جاں
خود بخود دل میں پیار اٹھتا ہے
تیرے جاتے ہی اس خرابے سے
شور گریہ ہزار اٹھتا ہے
اپنے یاں تو زمانے والوں کا
روز ہی اعتبار اٹھتا ہے
جونؔ اٹھتا ہے یوں کہو یعنی
میرؔ و غالبؔ کا یار اٹھتا ہے
تو نے پھر کسب زر کا ذکر کیا
کہیں ہم سے یہ بار اٹھتا ہے
ہے یہ تیشہ کہ ایک شعلہ سا
بر سر کہسار اٹھتا ہے
صف بہ صف آ کھڑے ہوئے ہیں غزال
دشت سے خاکسار اٹھتا ہے
کرب تنہائی ہے وہ شے کہ خدا
آدمی کو پکار اٹھتا ہے
بزم سے جب نگار اٹھتا ہے
میرے دل سے غبار اٹھتا ہے
کون ہے جس کو جاں عزیز نہیں
لے ترا جاں نثار اٹھتا ہے
لو وہ مجبور شہر صحرا سے
آج دیوانہ وار اٹھتا ہے
— سید حسین جون اصغر