مکمل شاعری

وہ جو سرمایۂ دل و جاں تھی

اب وہی آرزو پرائی ہے

جان جاں تجھ سے دو بدو ہو کر

میں نے خود سے شکست کھائی ہے

دولت دہر سب لٹائی ہے

میں نے دل کی کمائی کھائی ہے

موج باد صبا پہ ہو کے سوار

وہ شمیم خیال آئی ہے

ایک لمحے کو تیر کرنے میں

میں نے اک زندگی گنوائی ہے

عشق میرے گمان میں یاراں

دل کی اک زور آزمائی ہے

تو ہے آخر کہاں کہ آج مجھے

بے طرح اپنی یاد آئی ہے

وہ جو تھا جونؔ وہ کہیں بھی نہ تھا

حسن اک خواب کی جدائی ہے

بک نہیں پا رہا تھا سو میں نے

اپنی قیمت بہت بڑھائی ہے

شرم کر تو کہ دشت حالت میں

تیری لیلیٰ نے خاک اڑائی ہے

اس میں رہ کر بھی میں نہیں اس میں

جانیے دل میں کیا سمائی ہے

— سید حسین جون اصغر