مکمل شاعری
دولت دہر سب لٹائی ہے
میں نے دل کی کمائی کھائی ہے
ایک لمحے کو تیر کرنے میں
میں نے اک زندگی گنوائی ہے
عشق میرے گمان میں یاراں
دل کی اک زور آزمائی ہے
وہ جو سرمایۂ دل و جاں تھی
اب وہی آرزو پرائی ہے
شرم کر تو کہ دشت حالت میں
تیری لیلیٰ نے خاک اڑائی ہے
اس میں رہ کر بھی میں نہیں اس میں
جانیے دل میں کیا سمائی ہے
تو ہے آخر کہاں کہ آج مجھے
بے طرح اپنی یاد آئی ہے
وہ جو تھا جونؔ وہ کہیں بھی نہ تھا
حسن اک خواب کی جدائی ہے
جان جاں تجھ سے دو بدو ہو کر
میں نے خود سے شکست کھائی ہے
موج باد صبا پہ ہو کے سوار
وہ شمیم خیال آئی ہے
بک نہیں پا رہا تھا سو میں نے
اپنی قیمت بہت بڑھائی ہے
— سید حسین جون اصغر