مکمل شاعری

کوئی حالت نہیں یہ حالت ہے

یہ تو آشوب ناک صورت ہے

انجمن میں یہ میری خاموشی

بردباری نہیں ہے وحشت ہے

لوگ مصروف جانتے ہیں مجھے

یاں مرا غم ہی میری فرصت ہے

طنز پیرایۂ تبسم میں

اس تکلف کی کیا ضرورت ہے

ہم نے دیکھا تو ہم نے یہ دیکھا

جو نہیں ہے وہ خوبصورت ہے

وار کرنے کو جاں نثار آئیں

یہ تو ایثار ہے عنایت ہے

تجھ سے یہ گاہ گاہ کا شکوہ

جب تلک ہے بسا غنیمت ہے

خواہشیں دل کا ساتھ چھوڑ گئیں

یہ اذیت بڑی اذیت ہے

آج کا دن بھی عیش سے گزرا

سر سے پا تک بدن سلامت ہے

اب نکل آؤ اپنے اندر سے

گھر میں سامان کی ضرورت ہے

گرم جوشی اور اس قدر کیا بات

کیا تمہیں مجھ سے کچھ شکایت ہے

— سید حسین جون اصغر