مکمل شاعری

نشۂ شوق رنگ میں تجھ سے جدائی کی گئی

ایک لکیر خون کی بیچ میں کھینچ دی گئی

شوق کی ایک عمر میں کیسے بدل سکے گا دل

نبض جنون ہی تو تھی شہر میں ڈوبتی گئی

تھی جو کبھی سر سخن میری وہ خامشی گئی

ہائے کہن‌ سنن کی بات ہائے وہ بات ہی گئی

جونؔ جنوب زرد کے خاک بسر یہ دکھ اٹھا

موج شمال سبز جاں آئی تھی اور چلی گئی

کیا وہ گماں نہیں رہا ہاں وہ گماں نہیں رہا

کیا وہ امید بھی گئی ہاں وہ امید بھی گئی

دور بہ دور دل بہ دل درد بہ درد دم بہ دم

تیرے یہاں رعایت حال نہیں رکھی گئی

اس کی گلی سے اٹھ کے میں آن پڑا تھا اپنے گھر

ایک گلی کی بات تھی اور گلی گلی گئی

اس کی امید ناز کا مجھ سے یہ مان تھا کہ آپ

عمر گزار دیجیے عمر گزار دی گئی

— سید حسین جون اصغر