مکمل شاعری

ہیں میری ذات سے منسوب صد فسانۂ عشق

اور ایک سطر بھی اب تک نہیں لکھی میں نے

گنوائی کس کی تمنا میں زندگی میں نے

وہ کون ہے جسے دیکھا نہیں کبھی میں نے

مرے حریف مری یکہ تازیوں پہ نثار

تمام عمر حلیفوں سے جنگ کی میں نے

خود اپنے عشوہ و انداز کا شہید ہوں میں

خود اپنی ذات سے برتی ہے بے رخی میں نے

ترے عدم کو گوارا نہ تھا وجود مرا

سو اپنی بیخ کنی کی کمی نہ کی میں نے

ترا خیال تو ہے پر ترا وجود نہیں

ترے لیے تو یہ محفل سجائی تھی میں نے

خراش نغمہ سے سینہ چھلا ہوا ہے مرا

فغاں کہ ترک نہ کی نغمہ پروری میں نے

سرور مے پہ بھی غالب رہا شعور مرا

کہ ہر رعایت غم ذہن میں رکھی میں نے

دوا سے فائدہ مقصود تھا ہی کب کہ فقط

دوا کے شوق میں صحت تباہ کی میں نے

غم شعور کوئی دم تو مجھ کو مہلت دے

تمام عمر جلایا ہے اپنا جی میں نے

زبانہ زن تھا جگر سوز تشنگی کا عذاب

سو جوف سینہ میں دوزخ انڈیل لی میں نے

رہا میں شاہد تنہا نشین مسند غم

اور اپنے کرب انا سے غرض رکھی میں نے

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

— سید حسین جون اصغر