مکمل شاعری

خون تھوکے گی زندگی کب تک

یاد آئے گی اب تری کب تک

جس میں تھا سوز آرزو اس کا

شب غم وہ ہوا چلی کب تک

ہو کبھی تو شراب وصل نصیب

پیے جاؤں میں خون ہی کب تک

بنی آدم کی زندگی ہے عذاب

یہ خدا کو رلائے گی کب تک

دل نے جو عمر بھر کمائی ہے

وہ دکھن دل سے جائے گی کب تک

جانے والوں سے پوچھنا یہ صبا

رہے آباد دل گلی کب تک

ہے جہنم جو یاد اب اس کی

وہ بہشت وجود تھی کب تک

حادثہ زندگی ہے آدم کی

ساتھ دے گی بھلا خوشی کب تک

وہ صبا اس کے بن جو آئی تھی

وہ اسے پوچھتی رہی کب تک

میرؔ جونی ذرا بتائیں تو

خود میں ٹھہریں گے آپ ہی کب تک

حال صحن وجود ٹھہرے گا

تیرا ہنگام رخصتی کب تک

— سید حسین جون اصغر