مکمل شاعری
سخن میرا اداسی ہے سر شام
جو خاموشی پہ طاری ہو گئی ہے
وہ نازک لب ہے اب جانے ہی والا
مری آواز بھاری ہو گئی ہے
عجب حالت ہماری ہو گئی ہے
یہ دنیا اب تمہاری ہو گئی ہے
یقیں معذور ہے اب اور گماں بھی
بڑی بے روزگاری ہو گئی ہے
بہت ہی خوش ہے دل اپنے کیے پر
زمانے بھر میں خواری ہو گئی ہے
دل اب دنیا پہ لعنت کر کہ اس کی
بہت خدمت گزاری ہو گئی ہے
مرے پاس آ کے خنجر بھونک دے تو
بہت نیزہ گزاری ہو گئی ہے
وہ اک باد شمالی رنگ جو تھی
شمیم اس کی سواری ہو گئی ہے
— سید حسین جون اصغر