مکمل شاعری
جو زندگی بچی ہے اسے مت گنوائیے
بہتر یہ ہے کہ آپ مجھے بھول جائیے
ہر آن اک جدائی ہے خود اپنے آپ سے
ہر آن کا ہے زخم جو ہر آن کھائیے
تھوکا ہے میں نے خون ہمیشہ مذاق میں
میرا مذاق آپ ہمیشہ اڑائیے
تھی مشورت کی ہم کو بسانا ہے گھر نیا
دل نے کہا کہ میرے در و بام ڈھائیے
ہرگز مرے حضور کبھی آئیے نہ آپ
اور آئیے اگر تو خدا بن کے آئیے
اک طور دہ صدی تھا جو بے طور ہو گیا
اب جنتری بجائیے تاریخ گائیے
اب کوئی بھی نہیں ہے کوئی دل محلے میں
کس کس گلی میں جائیے اور گل مچائیے
شاعر ہے آپ یعنی کہ سستے لطیف گو
رشتوں کو دل سے روئیے سب کو ہنسائیے
اک لال قلعہ تھا جو میاں زرد پڑ گیا
اب رنگ ریز کون سے کس جا سے لائیے
اب کیا فریب دیجیے اور کس کو دیجیے
اب کیا فریب کھائیے اور کس سے کھائیے
بس فائلوں کا بوجھ اٹھایا کریں جناب
مصرعہ یہ جونؔ کا ہے اسے مت اٹھائیے
ہے یاد پر مدار میرے کاروبار کا
ہے عرض آپ مجھ کو بہت یاد آئیے
جو حالتوں کا دور تھا وہ تو گزر گیا
دل کو جلا چکے ہیں سو اب گھر جلائیے