مکمل شاعری
لمحے لمحے کی نارسائی ہے
زندگی حالت جدائی ہے
مرد میداں ہوں اپنی ذات کا میں
میں نے سب سے شکست کھائی ہے
میں ہنر مند رنگ ہوں میں نے
خون تھوکا ہے داد پائی ہے
اک عجب حال ہے کہ اب اس کو
یاد کرنا بھی بے وفائی ہے
جانے یہ تیرے وصل کے ہنگام
تیری فرقت کہاں سے آئی ہے
خود کو بھولا ہوں اس کو بھولا ہوں
عمر بھر کی یہی کمائی ہے
اب یہ صورت ہے جان جاں کہ تجھے
بھولنے میں مری بھلائی ہے
— سید حسین جون اصغر