مکمل شاعری

ہر اک حالت کے بیری ہیں یہ لمحے

کسی غم کے بھروسے پر نہ رہیو

ہمارا عمر بھر کا ساتھ ٹھیرا

سو میرے ساتھ تو دن بھر نہ رہیو

سہولت سے گزر جاؤ مری جاں

کہیں جینے کی خاطر مر نہ رہیو

سفر کرنا ہے آخر دو پلک بیچ

سفر لمبا ہے بے بستر نہ رہیو

سویرے ہی سے گھر آجائیو آج

ہے روز واقعہ باہر نہ رہیو

بہت دشوار ہو جائے گا جینا

یہاں تو ذات کے اندر نہ رہیو

نظر پر بار ہو جاتے ہیں منظر

جہاں رہیو وہاں اکثر نہ رہیو

کسی سے عہد و پیماں کر نہ رہیو

تو اس بستی میں رہیو پر نہ رہیو

کہیں چھپ جاؤ تہ خانوں میں جا کر

شب فتنہ ہے اپنے گھر نہ رہیو

— سید حسین جون اصغر