مکمل شاعری

کس طرح ترک مدعا کیجے

جب کوئی اپنا مدعا ہی نہیں

کام مجھ سے کوئی ہوا ہی نہیں

بات یہ ہے کہ میں تو تھا ہی نہیں

مجھ سے بچھڑی جو موج نکہت یار

پھر میں اس شہر میں رہا ہی نہیں

کون ہوں میں جو رائیگاں ہی گیا

کون تھا جو کبھی ملا ہی نہیں

ہوں عجب عیش غم کی حالت میں

اب کسی سے کوئی گلہ ہی نہیں

دل کی دنیا کچھ اور ہی ہوتی

کیا کہیں اپنا بس چلا ہی نہیں

ہر طرف ایک حشر برپا ہے

جونؔ خود سے نکل کے جا ہی نہیں

بات ہے راستے پہ جانے کی

اور جانے کا راستہ ہی نہیں

اب تو مشکل ہے زندگی دل کی

یعنی اب کوئی ماجرا ہی نہیں

موج آتی تھی ٹھہرنے کی جہاں

اب وہاں خیمۂ صبا ہی نہیں

ہے خدا ہی پہ منحصر ہر بات

اور آفت یہ ہے خدا ہی نہیں

— سید حسین جون اصغر