مکمل شاعری

ہے عجب حال یہ زمانے کا

یاد بھی طور ہے بھلانے کا

پسند آیا بہت ہمیں پیشہ

خود ہی اپنے گھروں کو ڈھانے کا

کاش ہم کو بھی ہو نصیب کبھی

عیش دفتر میں گنگنانے کا

اتنا نادم ہوا ہوں خود سے کہ میں

اب نہیں خود کو آزمانے کا

یہ جہاں جونؔ اک جہنم ہے

یاں خدا بھی نہیں ہے آنے کا

کیا کہوں جان کو بچانے میں

جونؔ خطرہ ہے جان جانے کا

جان کیا اب ترا پیالۂ ناف

نشہ مجھ کو نہیں پلانے کا

آسماں ہے خموشئ جاوید

میں بھی اب لب نہیں ہلانے کا

شوق ہے اس دل درندہ کو

آپ کے ہونٹ کاٹ کھانے کا

زندگی ایک فن ہے لمحوں کو

اپنے انداز سے گنوانے کا

— سید حسین جون اصغر