مکمل شاعری

آخری بار آہ کر لی ہے

میں نے خود سے نباہ کر لی ہے

جاں نثاروں پہ وار کیا کرنا

میں نے بس ہاتھ میں سپر لی ہے

اپنے سر اک بلا تو لینی تھی

میں نے وہ زلف اپنے سر لی ہے

جو بھی مانگو ادھار دوں گا میں

اس گلی میں دکان کر لی ہے

دن بھلا کس طرح گزارو گے

وصل کی شب بھی اب گزر لی ہے

میرا کشکول کب سے خالی تھا

میں نے اس میں شراب بھر لی ہے

اور تو کچھ نہیں کیا میں نے

اپنی حالت تباہ کر لی ہے

شیخ آیا تھا محتسب کو لیے

میں نے بھی ان کی وہ خبر لی ہے

— سید حسین جون اصغر