مکمل شاعری

وہ ہجوم دل زدگاں کہ تھا تجھے مژدہ ہو کہ بکھر گیا

ترے آستانے کی خیر ہو سر رہ غبار بھی اب نہیں

نہیں اب تو اہل جنوں میں بھی وہ جو شوق شہر میں عام تھا

وہ جو رنگ تھا کبھی کو بہ کو سر کوئے یار بھی اب نہیں

رہے نام رشتۂ رفتگاں نہ شکایتیں ہیں نہ شوخیاں

کوئی عذر خواہ تو اب کہاں کوئی عذر دار بھی اب نہیں

تجھے کیا خبر مہ و سال نے ہمیں کیسے زخم دیے یہاں

تری یادگار تھی اک خلش تری یادگار بھی اب نہیں

وہ جو اپنی جاں سے گزر گئے انہیں کیا خبر ہے کہ شہر میں

کسی جاں نثار کا ذکر کیا کوئی سوگوار بھی اب نہیں

کسے نذر دیں دل و جاں بہم کہ نہیں وہ کاکل خم بہ خم

کسے ہر نفس کا حساب دیں کہ شمیم یار بھی اب نہیں

نہ گلے رہے نہ گماں رہے نہ گزارشیں ہیں نہ گفتگو

وہ نشاط وعدۂ وصل کیا ہمیں اعتبار بھی اب نہیں

نہ ہوا نصیب قرار جاں ہوس قرار بھی اب نہیں

ترا انتظار بہت کیا ترا انتظار بھی اب نہیں

— سید حسین جون اصغر