مکمل شاعری

شمال جاودان سبز جاں سے

تمنا کی عماری جا رہی ہے

وہ سید بچہ ہو اور شیخ کے ساتھ

میاں عزت ہماری جا رہی ہے

فغاں اے دشمن دار دل و جاں

مری حالت سدھاری جا رہی ہے

ہے پہلو میں ٹکے کی اک حسینہ

تری فرقت گزاری جا رہی ہے

ہے برپا ہر گلی میں شور نغمہ

مری فریاد ماری جا رہی ہے

ہے سینے میں عجب اک حشر برپا

کہ دل سے بے قراری جا رہی ہے

دل اس کے رو بہ رو ہے اور گم صم

کوئی عرضی گزاری جا رہی ہے

تری مرہم نگاہی اے مسیحا

خراش دل پہ واری جا رہی ہے

چلو باد بہاری جا رہی ہے

پیا جی کی سواری جا رہی ہے

میں پیہم ہار کر یہ سوچتا ہوں

وہ کیا شے ہے جو ہاری جا رہی ہے

خرابے میں عجب تھا شور برپا

دلوں سے انتظاری جا رہی ہے

وہ یاد اب ہو رہی ہے دل سے رخصت

میاں پیاروں کی پیاری جا رہی ہے

بہت بد حال ہیں بستی ترے لوگ

تو پھر تو کیوں سنواری جا رہی ہے

جو ان روزوں مرا غم ہے وہ یہ ہے

کہ غم سے بردباری جا رہی ہے

دریغا تیری نزدیکی میاں جان

تری دوری پہ واری جا رہی ہے

— سید حسین جون اصغر