مکمل شاعری

کام کی بات میں نے کی ہی نہیں

یہ مرا طور زندگی ہی نہیں

میں جو تھا اس گلی کا مست خرام

اس گلی میں مری چلی ہی نہیں

اے امید اے امید نو میداں

مجھ سے میت تری اٹھی ہی نہیں

وہ جو رہتی تھی دل محلے میں

پھر وہ لڑکی مجھے ملی ہی نہیں

یہ سنا ہے کہ میرے کوچ کے بعد

اس کی خوشبو کہیں بسی ہی نہیں

مجھ میں اب میرا جی نہیں لگتا

اور ستم یہ کہ میرا جی ہی نہیں

تھی جو اک فاختہ اداس اداس

صبح وہ شاخ سے اڑی ہی نہیں

جائیے اور خاک اڑائیے آپ

اب وہ گھر کیا کہ وہ گلی ہی نہیں

ہائے وہ شوق جو نہیں تھا کبھی

ہائے وہ زندگی جو تھی ہی نہیں

— سید حسین جون اصغر