مکمل شاعری
چھپ کے بیٹھے گا کہاں تو ہم سے اے رنگیں نوا
ہوگا تو جس رنگ میں مل جائیں گے اس رنگ سے
دل بچے کیونکر بتوں کی چشم شوخ و شنگ سے
اپنا گھر تو سوجھتا ہے سیکڑوں فرسنگ سے
ایک بھی نکلے نہ میری سی فغان دل خراش
گرچہ خوں ٹپکے گلوئے مرغ خوش آہنگ سے
میرے گریے کے اثر سے ہو گئے پتھر بھی آب
جھڑتے ہیں جائے شرر پانی کے قطرے سنگ سے
ذوقؔ زیبا ہے جو ہو ریش سفید شیخ پر
وسمہ آب بنگ سے مہندی مئے گل رنگ سے
بل بے باریکی کہ گویا ہر ترا تار سخن
جنتری میں کھنچ کے نکلا ہے دہان تنگ سے
جوش گریہ سے رہی برسات برسوں پر کبھی
اس کی تیغ تیز آلودہ نہ دیکھی زنگ سے
پہلے یہ نیت وضو کی ہے نماز عشق میں
دل سے کہہ دیجے کہ دھووے ہاتھ نام و ننگ سے
اے تغافل کیش جلدی آ کہ تو واقف نہیں
اس دل بیتاب و جان مضطرب کے ڈھنگ سے
— شیخ ابراہیم ذوقؔ