مکمل شاعری
خاک سے تشنۂ دیدار کے سبزہ جو اٹھے
تو زباں اپنی نکالے ہوئے پانی مانگے
مار کر تیر جو وہ دلبر جانی مانگے
کہہ دو ہم سے نہ کوئی دے کے نشانی مانگے
مار پیچاں تو بلا ہے گا مگر تو اے زلف
ہے وہ کافر کہ نہ کاٹا ترا پانی مانگے
اے صنم دیکھ کے ہر دم کی تری کم سخنی
موت گھبرا کے نہ کیوں یہ خفقانی مانگے
دہن یار ہو اور مانگے کسی سے دل کو
وہ جو مانگے تو بانداز نہانی مانگے
دل مرا بوسہ بہ پیغام نہیں ہے ہمدم
یار لیتا ہے تو لے اپنی زبانی مانگے
جلوہ اس عالم معنی کا جو دیکھے اے ذوقؔ
لطف الفاظ نہ بے حسن معانی مانگے
— شیخ ابراہیم ذوقؔ