مکمل شاعری
میں جو شہید ہوں لب خندان یار کا
کیا کیا چراغ ہنستا ہے میرے مزار کا
ہنگامہ گرم ہستئ نا پائیدار کا
چشمک ہے برق کی کہ تبسم شرار کا
ہو راز دل نہ یار سے پوشیدہ یار کا
پردہ نہ درمیاں ہو جو دل کے غبار کا
ہے عین وصل میں بھی مری چشم سوئے در
لپکا جو پڑ گیا ہے مجھے انتظار کا
پہنچے گا تیرے پاس کبوتر سے پیشتر
مکتوب شوق اڑا کے ترے بے قرار کا
اس روئے تابناک پہ ہر قطرۂ عرق
گویا کہ اک ستارہ ہے صبح بہار کا
بجھنے کی دل کی آگ نہیں زیر خاک بھی
ہوگا درخت گور پہ میری چنار کا
دیکھ اپنے در گوش کو عارض سے متصل
دیکھا نہ ہو ستارہ جو صبح بہار کا
ہے دل کی داؤ گھات میں مژگاں سے چشم یار
ہے شوق اس کی ٹٹی کی اوجھل شکار کا
قاصد لکھوں لفافۂ خط کو غبار سے
تا جانے وہ یہ خط ہے کسی خاکسار کا
ہو پاک دامنوں کو خلش گر سے کیا خطر
کھٹکا نہیں نگاہ کو مژگاں کے خار کا
پوچھے ہے کیا حلاوت تلخابۂ سرشک
شربت ہے باغ خلد بریں کے انار کا
اے ذوقؔ ہوش گر ہے تو دنیا سے دور بھاگ
اس مے کدے میں کام نہیں ہوشیار کا