مکمل شاعری
جن کی نظر چڑھا ترا رخسار آتشیں
ان کا چراغ گور نہ تا حشر گل ہوا
محفل میں شور قلقل مینائے مل ہوا
لا ساقیا پیالہ کہ توبہ کا قل ہوا
بندہ نوازیاں تو یہ دیکھو کہ آدمی
جزو ضعیف محرم اسرار کل ہوا
آئی تہی دروں کی نہ ہرگز سمجھ میں بات
آوازہ گو بلند مثال دہل ہوا
پروانہ بھی تھا گرم تپش پر کھلا نہ راز
بلبل کی تنگ حوصلگی تھی کہ غل ہوا
دریائے غم سے میرے گزرنے کے واسطے
تیغ خمیدہ یار کی لوہے کا پل ہوا
اس بن رہا چمن میں بھی میں ذوقؔ دل خراش
ناخن سے تیز تر مجھے ہر برگ گل ہوا
— شیخ ابراہیم ذوقؔ