مکمل شاعری

بجھے گا سوز دل اے گریہ پل میں آب تو دے

دگر ہے آگ میں دنیا یوں ہی عذاب تو دے

گزرنے گر یہ مرے سر سے اتنا آب تو دے

کہ سر پہ چرخ بھی دکھلائی جوں حباب تو دے

کہاں تلک کہوں ساقی کہ لا شراب تو دے

نہ دے شراب ڈبو کر کوئی کباب تو دے

ہزاروں تشنہ جگر کس سے ہوئیں گے سیراب

خدا کے واسطے تیغ ستم کو آب تو دے

تمہارے مطلع ابرو پہ یہ کہے ہے خال

کہ ایسا نقطہ کوئی وقت انتخاب تو دے

در قبول ہے درباں نہ بند کر در یار

دعائے خیر مری ہونے مستجاب تو دے

بلا سے آپ نہ آئیں پہ آدمی ان کا

تسلی آ کے مجھے وقت اضطراب تو دے

کھلے ہے ناز سے گلشن میں غنچۂ نرگس

ذرا دکھا تو اسے چشم نیم خواب تو دے

بلا سے کم نہ ہو گریہ سے میرا سوز جگر

بجھا پر ان کی ذرا آتش عتاب تو دے

ہوا بگولے میں ہے کشتگان زلف کی خاک

کہ بعد مرگ بھی معلوم پیچ و تاب تو دے

شہید کیجیو قاتل ابھی نہ کر جلدی

ٹھہرنے مجھ کو تہ تیغ اضطراب تو دے

دل برشتہ کو میرے نہ چھوڑو مے خوارو

جو لذت اس میں ہے ایسا مزا کباب تو دے

شکار بستۂ فتراک کو ترے مقدور

ہوا نہ یہ بھی کہ بوسہ سر رکاب تو دے

جواب نامہ نہیں گر تو رکھ دو نامۂ یار

جو پوچھیں قبر میں عاشق سے کچھ جواب تو دے

نشے میں ہوش کسے جو گنے حساب کرے

جو تجھ کو دینا ہیں بوسے بلا حساب تو دے

پہنچ رہوں گا سر منزل فنا اے ذوقؔ

مثال نقش قدم کرنے پا تراب تو دے

رکھے ہے حوصلہ دریا کب اہل ہمت کا

نہیں یہ اتنا کہ بھر کاسۂ حباب تو دے

کرے گا قتل وہ اے ذوقؔ تجھ کو سرمے سے

نگہ کی تیغ کو ہونے سیاہ تاب تو دے

خنک دلوں کی اگر آہ سرد دوزخ میں

پڑے تو واقعی اک بار آگ داب تو دے

کہاں بجھی ہے تہ خاک میری آتش دل

کہو ہوا سے ہلا دامن سحاب تو دے

— شیخ ابراہیم ذوقؔ