مکمل شاعری

خوب روکا شکایتوں سے مجھے

تو نے مارا عنایتوں سے مجھے

کہتے کیا کیا ہیں دیکھ تو اغیار

یار تیری حمایتوں سے مجھے

دم گریہ کمی نہ کر اے چشم

شوق کم ہے کفایتوں سے مجھے

کمیٔ گریہ نے جلا مارا

ہوا نقصاں کفایتوں سے مجھے

کیا غضب ہے کہ دوست تو سمجھے

دشمنوں کی رعایتوں سے مجھے

لے گئی عشق کی ہدایت ذوقؔ

ان کنے سب نہایتوں سے مجھے

واجب القتل اس نے ٹھہرایا

آیتوں سے روایتوں سے مجھے

— شیخ ابراہیم ذوقؔ