مکمل شاعری

اے زاہد دو رنگ نہ پیر آپ کو بنا

مانند صبح کاذب ابھی ہے ادھیڑ تو

رند خراب حال کو زاہد نہ چھیڑ تو

تجھ کو پرائی کیا پڑی اپنی نبیڑ تو

ہو قطع نخل الفت اگر پھر بھی سبز ہو

کیا ہو جو پھینکے جڑ ہی سے اس کو اکھیڑ تو

عمر رواں کا توسن چالاک اس لیے

تجھ کو دیا کہ جلد کرے یاں سے ایڑ تو

ناخن خدا نہ دے تجھے اے پنجۂ جنوں

دے گا تمام عقل کے بخیے ادھیڑ تو

چھٹتا ہے کون مر کے گرفتار دام زلف

تربت پہ اس کی جال کا پائے گا پیڑ تو

اس صید مضطرب کو تحمل سے ذبح کر

دامان و آستیں نہ لہو میں لتھیڑ تو

آوارگی سے کوئے محبت کی ہاتھ اٹھا

اے ذوقؔ یہ اٹھا نہ سکے گا کھکھیڑ تو

جو سوتی بھیڑ باعث غوغا جگائے پھر

دروازہ گھر کا اس سگ دنیا پہ بھیڑ تو

یہ تنگنائے دہر نہیں منزل فراغ

غافل نہ پاؤں حرص کے پھیلا سکیڑ تو

— شیخ ابراہیم ذوقؔ