مکمل شاعری

ایثار خود شناسی توحید اور صداقت

اے دل ستون ہیں یہ ایوان بندگی کے

رنج و الم میں کچھ کچھ آمیزش مسرت

ہیں نقش کیسے دل کش تصویر زندگی کے

رخسار آج دھو کر شبنم نے پنکھڑی کے

کچھ اور بخش ڈالے انداز دل کشی کے

فرضی خدا بنائے سجدے کئے بتوں کو

اللہ رے کرشمے احساس کم تری کے

صحرائیوں سے سیکھے کوئی رموز ہستی

آبادیوں میں اکثر دشمن ہیں آگہی کے

قلب و جگر کے ٹکڑے یہ آنسوؤں کے قطرے

اللہ راس لائے حاصل ہیں زندگی کے

جان خلوص بن کر ہم اے شکیبؔ اب تک

تعلیم کر رہے ہیں آداب زندگی کے

— شکیب جلالی