مکمل شاعری
نقاب رخ اٹھایا جا رہا ہے
گھٹا میں چاند آیا جا رہا ہے
سلامت آپ کا جور مسلسل
مرے دل کو دکھایا جا رہا ہے
کہاں کا جام جب یاں ذوق مستی
نگاہوں سے پلایا جا رہا ہے
زمانے کی نگاہوں میں سمو کر
مجھے دل سے بھلایا جا رہا ہے
ابھی ارمان کچھ باقی ہیں دل میں
مجھے پھر آزمایا جا رہا ہے
شکیبؔ اب وہ تصور میں نہ آئیں
کلیجہ منہ کو آیا جا رہا ہے
پلا کر پھر شراب حسن و جلوہ
مجھے بے خود بنایا جا رہا ہے
— شکیب جلالی