مکمل شاعری

کبھی الفت سی جھلکتی ہے کبھی نفرت سی

اے تعلق ترے ابہام پہ رونا آیا

لے کے ابھرے گی سحر پھر وہی پژمردہ کرن

کیا کہوں تیرگئ شام پہ رونا آیا

بے سبب اپنی نگاہوں سے گرا جاتا ہوں

اس فسوں کاری الزام پہ رونا آیا

دل کا مفہوم اشاروں سے اجاگر نہ ہوا

بے کسئ گلۂ خام پہ رونا آیا

اتنے ارزاں تو نہیں تھے مرے اشکوں کے گہر

آج کیوں تلخیٔ آلام پہ رونا آیا

مری خوشیاں کبھی جس نام سے وابستہ تھیں

جانے کیوں آج اسی نام پہ رونا آیا

خواب گل رنگ کے انجام پہ رونا آیا

آمد صبح شب اندام پہ رونا آیا

اب بھی منزل مرے قدموں کی تمنائی ہے

کیا کہوں حسرت یک گام پہ رونا آیا

ان کے شبہات میں کچھ اور اضافہ تھا شکیبؔ

اشک سادہ کے اس انعام پہ رونا آیا

لائق حسن نظر تھے نہ کبھی ان کے خطوط

آج محرومئ پیغام پہ رونا آیا

رونے والا تو کرے گا نہ کسی کا شکوہ

لاکھ کہئے غم ایام پہ رونا آیا

— شکیب جلالی