مکمل شاعری

موت نے آج خودکشی کر لی

زیست پر کیا بنی خدا جانے

کوئی اس دل کا حال کیا جانے

ایک خواہش ہزار تہہ خانے

راز یہ ہے کہ کوئی راز نہیں

لوگ پھر بھی مجھے نہ پہچانے

کتنا مشکل ہے منزلوں کا حصول

کتنے آساں ہیں جال پھیلانے

دور سے ایک چیخ ابھری تھی

بن گئے بے شمار افسانے

زیست کے شور و شر میں ڈوب گئے

وقت کو ناپنے کے پیمانے

وقت نے یہ کہا ہے رک رک کر

آج کے دوست کل کے بیگانے

پھر ہوا کوئی بد گماں ہم سے

پھر جنم لے رہے ہیں افسانے

— شکیب جلالی