مکمل شاعری

آگ کے درمیان سے نکلا

میں بھی کس امتحان سے نکلا

پھر ہوا سے سلگ اٹھے پتے

پھر دھواں گلستان سے نکلا

چاندنی جھانکتی ہے گلیوں میں

کوئی سایہ مکان سے نکلا

چاند جس آسمان میں ڈوبا

کب اسی آسمان سے نکلا

یہ گہر جس کو آفتاب کہیں

کس اندھیرے کی کان سے نکلا

جب بھی نکلا ستارۂ امید

کہر کے درمیان سے نکلا

شکر ہے اس نے بے وفائی کی

میں کڑے امتحان سے نکلا

لوگ دشمن ہوئے اسی کے شکیبؔ

کام جس مہربان سے نکلا

ایک شعلہ پھر اک دھویں کی لکیر

اور کیا خاکدان سے نکلا

— شکیب جلالی