مکمل شاعری

اب کون جائے کوئے ملامت کو چھوڑ کر

قدموں سے آ کے اپنا ہی سایہ لپٹ گیا

لگتا تھا بے کراں مجھے صحرا میں آسماں

پہنچا جو بستیوں میں تو خانوں میں بٹ گیا

رکھتا ہے خود سے کون حریفانہ کشمکش

میں تھا کہ رات اپنے مقابل ہی ڈٹ گیا

وہ لمحۂ شعور جسے جانکنی کہیں

چہرے سے زندگی کے نقابیں الٹ گیا

جس کی اماں میں ہوں وہی اکتا گیا نہ ہو

بوندیں یہ کیوں برستی ہیں بادل تو چھٹ گیا

ٹھوکر سے میرا پاؤں تو زخمی ہوا ضرور

رستے میں جو کھڑا تھا وہ کہسار ہٹ گیا

اک حشر سا بپا تھا مرے دل میں اے شکیبؔ

کھولیں جو کھڑکیاں تو ذرا شور گھٹ گیا

بانہوں میں آ سکا نہ حویلی کا اک ستون

پتلی میں میری آنکھ کی صحرا سمٹ گیا

یا اتنا سخت جان کہ تلوار بے اثر

یا اتنا نرم دل کہ رگ گل سے کٹ گیا

ساحل تمام اشک ندامت سے اٹ گیا

دریا سے کوئی شخص تو پیاسا پلٹ گیا

گنبد کا کیا قصور اسے کیوں کہو برا

آیا جدھر سے تیر ادھر ہی پلٹ گیا

— شکیب جلالی