مکمل شاعری

نظر سے خاص تھی جو شعلگی وہ عام ہوئی

کہاں کی آب و ہوا کس سفر کے نام ہوئی

میں جیسے رک سا گیا پھر کنارۂ جاں پر

وہ لہر جب مری آنکھوں سے ہم کلام ہوئی

یہ خواب جیسے کسی ساعت دگر کے ہیں خواب

یہ شام اپنے قرینے میں ایسی شام ہوئی

میں دل کی اوٹ سے سب سن رہا تھا اور چپ تھا

نواح جاں میں یہ کیسی ندا تمام ہوئی

یہ روشنی کہ جسے لکھ رہا ہوں نغمۂ نور

مجھی میں نظم ہوئی نظم بھی مدام ہوئی

غروب مہر نے خوابوں کو راہ دی آخر

دیار دل میں بہت دن کے بعد شام ہوئی

— شاہین عباس