مکمل شاعری
کیا اے سونے والے رحم صبح وصل نے تجھ پر
کہ جوں جوں کھلتی ہیں آنکھیں مٹا جاتا ہے شک تیرا
بتا حد سے سوا ہم پاؤں پھیلائیں کدھر جائیں
فقط دو گز زمیں اپنی ہے اور ساتوں فلک تیرا
وہ عالمگیر جلوہ اور حسن مشترک تیرا
خدا جانے ان آنکھوں کو ہوا کس کس پہ شک تیرا
ترے نقش قدم کی گرد تک پہنچے نہ واماندہ
بہت پیچھا کیا اے کارواں کوسوں تلک تیرا
اگر آنکھیں سلامت ہیں تو کیا کیا کچھ دکھائے گا
یہی پھیلا ہوا جلوہ سما سے تا سمک تیرا
غذائے روح ہے اے حسن تو اپنی ملاحت سے
ہر اک کے ذائقے میں ٹھیک ہے آب و نمک تیرا
عبث الجھا کے رکھا ہے کوئی انصاف بھی آخر
امیدیں ساتھ دیں گی شادؔ آخر کب تلک تیرا
بہت تو نے جب اپنے پاؤں پھیلائے تو کیا چارہ
ادب کرتی رہی اے اشک مدت تک پلک تیرا
مری ہم دردیوں سے ہو گئی غیروں کو اک عبرت
لیا گھبرا کے جب جب نام نامی بے دھڑک تیرا
نہ پوچھو عشق نے غیرت سے کیا کیا رنگ بدلا ہے
خیال آیا ہے ساتھ اوروں کے جب جب مشترک تیرا
فقط زاہد پہ کیا موقوف سب کی رال ٹپکی ہے
وہ شوخی وہ نمو کے دن وہ چہرہ بے ڈلک تیرا
بس اب حد ہے کہ غیروں تک کا دامن جا کے پکڑا ہے
ڈگے کس کس جگہ ہم ہو گیا کس کس پہ شک تیرا