مکمل شاعری
جاتے ہی دل اس گلی میں مر گیا
مرنے والا بے وفائی کر گیا
کس بری ساعت سے خط لے کر گیا
نامہ بر اب تک نہ آیا مر گیا
حسرتیں تھیں جینے والی جی گئیں
مرنے والا تھا دل اپنا مر گیا
غم کی لذت ابتدا میں تھی مگر
اس قدر کھایا کہ اب جی بھر گیا
دل تو جانے کو گیا لیکن مجھے
اس بھری محفل میں رسوا کر گیا
مرنے والے دل تجھے اب کیا کہوں
خیر بخشا میں نے جو کچھ کر گیا
دل نے اک دن بھی نہ دیکھا تجھ کو آہ
اس گلی تک خواب میں اکثر گیا
ہر نوالہ اس کا اب تو تلخ ہے
عمر نعمت تھی مگر جی بھر گیا
کیا کہوں احوال اٹھتی بزم کا
پہلے مینا بعد کو ساغر گیا
کیا کہوں ان آنسوؤں کا زور و شور
آنکھیں جھپکی تھیں کہ چلو بھر گیا
جس کا کہلاتا ہے واں تھی کیا کمی
اے گدا کیوں مانگنے دردر گیا
دل گلہ کرتا تھا خوب اس شوخ کا
تذکرہ محشر کا سن کر ڈر گیا
دل نے سبقت کی حواس و صبر پر
پہلے سلطاں بعد کو لشکر گیا
جس جگہ دارا کو بھیجا تھا وہیں
کچھ دنوں کے بعد اسکندر گیا
منہ سے نکلا تھا کہ پہنچا عرش پر
نالۂ دل نام اونچا کر گیا
مے کشو ماتم کرو اب شادؔ کا
ہائے کیا مے خوار رحلت کر گیا
دل یہ امڈا مے سے خالی دیکھ کر
جام اشکوں سے لبالب بھر گیا
گر نہ جائے خاک پر قطرہ کوئی
بس بس اے ساقی کہ ساغر بھر گیا
شادؔ کیا کچھ کم ہیں دو کم ساٹھ سال
زندگی سے بس دل اپنا بھر گیا