مکمل شاعری

جسے پالا تھا اک مدت تک آغوش تمنا میں

وہی بانی ہوا میرے غم و درد و اذیت کا

مٹائیں تاکہ اپنے ظلم کرنے کی ندامت کو

نکالیں ڈھونڈ کر ہر طرح سے پہلو شکایت کا

اسی کے ہاتھ سے کیا کیا سہا سہنا ہے کیا کیا کچھ

الٰہی دو جہاں میں منہ ہو کالا اس مروت کا

کریں انصاف کا دعویٰ اثر کچھ بھی نہ ظاہر ہو

مزا چکھا ہے ایسے دوستوں سے بھی محبت کا

مری عمر دو روزہ بیکسی کے ساتھ کٹتی ہے

نہ اپنوں سے نہ غیروں سے ملا ثمرہ ریاضت کا

طمع میں کچھ نہ سمجھیں باپ اور بھائی کی حرمت کو

عمل دیکھو تو یہ پھر کچھ کریں دعوا شرافت کا

حسد جی میں بھرا ہے لاگ ہے اک عمر سے دل میں

کریں ظاہر اگر موقع ہے اظہار عداوت کا

جسے دیکھا جسے پایا غرض کا اپنی بندہ تھا

جہاں میں اب مزا باقی نہیں خالص محبت کا

ہمارا کلبۂ احزاں ہے ہم ہیں یا کتابیں ہیں

رہا باقی نہ کوئی ہم نشیں اب اپنی قسمت کا

خدا آباد رکھے شادؔ میرے ان عزیزوں کو

مزا چکھوا دیا القرض مقراض المحبت کا

— شاد عظیم آبادی