مکمل شاعری

مصیبت جس سے زائل ہو رہی سامان کر دے گا

نہ گھبرانا خدا سب مشکلیں آسان کر دے گا

قناعت کی بھی دولت ہو تو استغنا نہیں لازم

جسے تو نفع سمجھا ہے یہی نقصان کر دے گا

خرابات جہاں میں کون ہے دل سوز ساقی سا

اگر ترچھٹ بھی دینا ہے تو تجھ کو چھان کر دے گا

متاع بے بہا سے کم نہ جان اے چشم اشکوں کو

یہی رونا ترا خالی تری دوکان کر دے گا

جگہ دل میں نہ دے شوق نموداری بری شے ہے

یہی چسکا تجھے برباد اے نادان کر دے گا

یقیں کر لے کہ خود وہ جلوہ گر پردے میں ہے ورنہ

یہی ظالم گماں تیرا تجھے حیران کر دے گا

کوئی گر سلطنت بھی دے تو واپس کر نہ لے اے دل

سبک ہر طرف تجھ کو غیر کا احسان کر دے گا

کہوں گا آج سے میں صاحب اعجاز ناصح کو

اگر میرے دل مضطر کا اطمینان کر دے گا

کہے دیتا ہوں قاتل لے خبر جاں باز کی اپنے

فنا شوق شہادت میں کسی دن جان کر دے گا

تری رو پوشیاں اے حسن کب بیکار جائیں گی

یہی پردہ عیاں عالم میں تیری شان کر دے گا

تمناؤں کی مہمانی تصور کے حوالے کر

کہ جو ساماں مناسب ہے وہی سامان کر دے گا

غزل سے کیا مراد اے شادؔ ہے ارباب معنی کی

کسی دن تصفیہ اس کا مرا دیوان کر دے گا

— شاد عظیم آبادی