مکمل شاعری
داغ ہو یا سوز ہو یا درد و غم
لے لیا خوش ہو کے جس نے جو دیا
جب کسی نے حال پوچھا رو دیا
چشم تر تو نے تو مجھ کو کھو دیا
اشک ریزی کے دھڑلے نے غبار
جب ذرا بھی دل پہ دیکھا دھو دیا
دل کی پروا تک نہیں اے بے خودی
کیا کیا پھینکا کہاں کس کو دیا
یہ بھی نشہ مے کشو کچھ کم نہیں
دے نہ دے ساقی پہ تم سمجھو دیا
کچھ نہ کچھ اس انجمن میں حسب حال
تو نے قسام ازل سب کو دیا
شادؔ کے آگے بھلا کیا ذکر یار
نام ادھر آیا کہ اس نے رو دیا
کشت دنیا کیا خبر کیا پھل ملے
تخم غم ہم نے تو آ کر بو دیا
زمرۂ اہل قلم میں لکھ کے نام
خود کو ناحق شادؔ تو نے کھو دیا
— شاد عظیم آبادی