مکمل شاعری

اب انتہا کا ترے ذکر میں اثر آیا

کہ منہ سے نام لیا دل میں تو اتر آیا

بہت دنوں پہ مری چشم میں نظر آیا

اے اشک خیر تو ہے، تو کدھر کدھر آیا

ہزار شکر کہ اس دل میں تو نظر آیا

یہ نقشہ صفحۂ خالی پہ جلد اتر آیا

بشر حباب کی صورت ہمیں نظر آیا

بھری جو قطرہ کے اندر ہوا ابھر آیا

زباں پہ آتا ہے نالہ بھی سو کرشموں سے

کہاں سے آپ کے انداز کا اثر آیا

لکھے کو روئیے اب تابہ حشر تربت میں

کہ میرے مرنے پہ خط لے کے نامہ بر آیا

عدم میں عیش ہے چلتا ہوں میں بھی لے اے دل

جہاں میں جتنے مصیبت کے دن تھے بھر آیا

پڑا ہے شب سے یوں ہی اب تلک نہ لی کروٹ

دل ستم زدہ اس کی گلی سے مر آیا

ہمارے پائے طلب نے بڑی مہم سر کی

کہ کٹ کے سامنے قاتل کے اپنا سر آیا

ریا تو دل میں تھی ماتھے پہ اب ہے اس کا نشاں

کہاں کا داغ کہاں دفعتاً ابھر آیا

مقیم دل ہے ڈنواں ڈول رہ کے اب ایماں

بتوں کے قہر سے چھوٹا خدا کے گھر آیا

ہزار شکر خدا کا یہی غنیمت ہے

نہ خیر آیا مرے دل کو اور شر آیا

وہ چاہے بد کہے قاصد بتوں کو یا مجھ کو

حرم میں چین سے ایمان جا کے دھر آیا

ہزار شکر ہوا آفتاب حشر طلوع

بڑی تو لاج رہی یہ کہ تو نظر آیا

شراب پی کے میں پہنچا فلک پہ اے ساقی

کہاں سے ان کئی قطروں میں یہ اثر آیا

ہجوم غم نے سکھانے کی لاکھ کوشش کی

ہمیں تو آہ بھی کرنا نہ عمر بھر آیا

جو چند دن میں ہوئے ذی کمال کون ہیں شادؔ

ہمیں تو شعر کا کہنا نہ عمر بھر آیا

گواہیاں ہوئیں اعضا کی حشر میں مقبول

وہ پاک ہو گئے الزام میرے سر آیا

اسی کو شعر سمجھتے ہیں شادؔ اہل مذاق

ادھر پڑھا کہ دلوں میں ادھر اتر آیا

لحد میں شانہ ہلا کر یہ موت کہتی ہے

لے اب تو چونک مسافر کہ اپنے گھر آیا

— شاد عظیم آبادی