مکمل شاعری

نہیں اٹھتے قدم کیوں جانب دیر

کسی مسجد میں بہکایا گیا ہوں

ہوں اس کوچے کے ہر ذرے سے آگاہ

ادھر سے مدتوں آیا گیا ہوں

تمناؤں میں الجھایا گیا ہوں

کھلونے دے کے بہلایا گیا ہوں

ستایا آ کے پہروں آرزو نے

جو دم بھر آپ میں پایا گیا ہوں

سویرا ہے بہت اے شور محشر

ابھی بے کار اٹھوایا گیا ہوں

دل مضطر سے پوچھ اے رونق بزم

میں خود آیا نہیں لایا گیا ہوں

نہ تھا میں معتقد اعجاز مے کا

بڑی مشکل سے منوایا گیا ہوں

عدم میں کیوں نہ جاؤں منہ چھپائے

بھری محفل سے اٹھوایا گیا ہوں

لحد میں کیوں نہ جاؤں منہ چھپا کر

بھری محفل سے اٹھوایا گیا ہوں

کجا میں اور کجا اے شادؔ دنیا

کہاں سے کس جگہ لایا گیا ہوں

— شاد عظیم آبادی