مکمل شاعری

اسی کنارۂ حیرت سرا کو جاتا ہوں

میں اک سوار ہوں کوہ ندا کو جاتا ہوں

رمیدگی کا بیاباں ہے اور بے خور و خواب

غبار کرتا سکوت و صدا کو جاتا ہوں

حذر کہ دجلۂ دشوار پر قدم رکھتا

شکارگاہ فرات و فنا کو جاتا ہوں

کہاں گئے وہ خدایان درہم و دینار

کہ اک دفینۂ دشت بلا کو جاتا ہوں

وہ دن بھی آئے کہ انکار کر سکوں ثروتؔ

ابھی تو معبد حمد و ثنا کو جاتا ہوں

قریب ہی کسی خیمے سے آگ پوچھتی ہے

کہ اس شکوہ سے کس قرطبہ کو جاتا ہوں

سفارت حد حیرانگی پہ ہوں مامور

نگار خانۂ حسن و ادا کو جاتا ہوں

— ثروت حسین