مکمل شاعری

کہاں کس آئنے میں کون سا چہرہ دمکتا ہے

ذرا حیرت سرائے آب و گل میں گھوم کر دیکھوں

گزر گاہیں جہاں پر ختم ہوتی ہیں وہاں کیا ہے

کوئی رہرو پلٹ کر آئے تو معلوم کر دیکھوں

ہوا و ابر کو آسودۂ مفہوم کر دیکھوں

شروع فصل گل ہے ان لبوں کو چوم کر دیکھوں

مرے سینے میں دل ہے یا کوئی شہزادۂ خود سر

کسی دن اس کو تاج و تخت سے محروم کر دیکھوں

بہت دن دشت و در میں خاک اڑاتے ہوئے ثروتؔ

اب اپنے صحن میں اپنی فضا میں جھوم کر دیکھوں

— ثروت حسین