مکمل شاعری

مری جانب کوئی آئے تو پوچھوں

نشان راہ ہوں منزل ہوں کیا ہوں

نیا مضموں کتاب زیست کا ہوں

نہایت غور سے سوچا گیا ہوں

کسی کو کیا بتاؤں کون ہوں میں

کہ اپنی داستاں بھولا ہوا ہوں

خود اپنی دید سے اندھی ہیں آنکھیں

خود اپنی گونج سے بہرا ہوا ہوں

سنیں مجھ کو تو میں دھڑکن ہوں دل کی

نہیں سنتے تو صحرا کی صدا ہوں

مری سیرابیوں میں تشنگی ہے

کہ میں دریا ہوں لیکن ریت کا ہوں

وہ رن مجھ میں پڑا ہے خیر و شر کا

کہ اپنی ذات میں اک کربلا ہوں

مرا سینہ ہے چھلنی نے کی صورت

انہیں زخموں سے میں نغمہ سرا ہوں

مری موجودگی سے بندگی ہے

کہ جب سے گم ہوا ہوں میں خدا ہوں

مجھے شبنم کا آئینہ ملا ہے

اسی میں گل کی صورت دیکھتا ہوں

— سلیم احمد