مکمل شاعری

دل حسن کو دان دے رہا ہوں

گاہک کو دکان دے رہا ہوں

میں غم کو بسا رہا ہوں دل میں

بے گھر کو مکان دے رہا ہوں

شاید کوئی بندۂ خدا آئے

صحرا میں اذان دے رہا ہوں

گونگی ہے ازل سے جو حقیقت

میں اس کو زبان دے رہا ہوں

بے جادہ و راہ ہے جو منزل

میں اس کا نشان دے رہا ہوں

ہر کہنہ یقیں کو از سر نو

اک تازہ گمان دے رہا ہوں

جو فصل ابھی کٹی نہیں ہے

میں اس کا لگان دے رہا ہوں

رکھوں جو لحاظ مصلحت کا

کیا کوئی بیان دے رہا ہوں

حاصل کا حساب ہو رہے گا

فی الحال تو جان دے رہا ہوں

— سلیم احمد