مکمل شاعری

دل کے اندر درد آنکھوں میں نمی بن جائیے

اس طرح ملیے کہ جزو زندگی بن جائیے

جس طرح دریا بجھا سکتے نہیں صحرا کی پیاس

اپنے اندر ایک ایسی تشنگی بن جائیے

جس طرح خالی انگوٹھی کو نگینہ چاہئے

عالم امکاں میں اک ایسی کمی بن جائیے

اک پتنگے نے یہ اپنے رقص آخر میں کہا

روشنی کے ساتھ رہیے روشنی بن جائیے

عقل کل بن کر تو دنیا کی حقیقت دیکھ لی

دل یہ کہتا ہے کہ اب دیوانگی بن جائیے

عالم کثرت نہاں ہے اس اکائی میں سلیمؔ

خود میں خود کو جمع کیجے اور کئی بن جائیے

دیوتا بننے کی حسرت میں معلق ہو گئے

اب ذرا نیچے اتریے آدمی بن جائیے

— سلیم احمد