مکمل شاعری

تم تو آنکھ والے تھے عکس مل گیا ہوگا

میں سدا کا بے چہرہ میرا آئینہ ہی کیا

عجز خاکساری کیوں فخر کج کلاہی کیا

جب محبتیں کی ہیں پھر کوئی گواہی کیا

ہم رتوں کے مجرم ہیں ہر ہوا کی نظروں میں

تیری پارسائی کیا میری بے گناہی کیا

وصل کا کوئی لمحہ رائیگاں نہیں لیکن

جو الگ نہ کرتا ہو ایسا راستہ ہی کیا

جانے کب بگڑ جائیں جانے کب سنور جائیں

دست کوزہ گر میں ہیں اپنا آسرا ہی کیا

تم سلیمؔ شاعر ہو شہرتوں پہ مت جاؤ

مسند فقیری پہ خبط بادشاہی کیا

شب گزیدہ لوگوں کو نیند سے الجھنا ہے

رات کی مسافت میں رزم صبح گاہی کیا

— سلیم کوثر