مکمل شاعری

اک عمر ہوئی موسم زنداں نہیں بدلا

روزن ہے وہی دیدۂ نمناک وہی ہے

کیا چشم رفو گر سے شکایت ہو کہ اب تک

وحشت ہے وہی سینۂ صد چاک وہی ہے

ہر چند کہ حالات موافق نہیں پھر بھی

دل تیری طرف داری میں سفاک وہی ہے

جو کچھ ہے مرے پاس وہ میرا نہیں شاید

جو میں نے گنوا دی مری املاک وہی ہے

وسعت ہے وہی تنگئی افلاک وہی ہے

جو خاک پہ ظاہر ہے پس خاک وہی ہے

زوروں پہ سلیمؔ اب کے ہے نفرت کا بہاؤ

جو بچ کے نکل آئے گا تیراک وہی ہے

اک ہاتھ کی جنبش میں در و بست ہے ورنہ

گردش وہی کوزہ ہے وہی چاک وہی ہے

— سلیم کوثر